Околу 90 повредени и 142 приведени е билансот од првомајските судири помеѓу полицијата и демонстрантите во Истанбул, соопшти градоначалникот на градот, Авни Мутлу.
Според него демонстрациите биле „незаконски акции, кои го нарушуваат јавниот ред“.
Во вчерашните судири турската полиција употреби солзавец и водени топови за да ги спречи демонстрантите да пристигнат на плоштадот Таксим, бидејќи властите забранија митинзи за Први мај.
По наредба на Владата намален беше и бројот на возила на градскиот транспорт во Истанбул со цел да се ограничи движењето на граѓаните.
Откако во 1977 година на Таксим беа убиени 34 луѓе во судири меѓу полицијата и демонстранти, тоа место во Истанбул има посебно значење. Повеќе од 30 години плоштадот беше затворен за демонстрации, кратко време беше отворен, од 2010 година па се до лани кога ескалираа протестите во Турција.