Роберт Просинечки е пред промоција за нов тренер на Бурсаспор. Клубот и поранешниот репрезентативец на СФРЈ и на Хрватска, според медиумите во Турција, наводно веќе постигнале договор на една година со можност за продолжување за уште две ипол, а до официјализирање на соработката ги дели само потпис.
Бурсаспор, која истакна високи амбиции во турската Суперлига за оваа сезона, нанижа три порази и во Просинечки гледа гледа решение да не западне во поголема криза што би се одразила врз клупските цели на крај на шампионатот.
По завршување на играчката кариера, Хрватот работеше како асистент во стручниот штаб на „коцкестите“ за потоа да седне на клупата на белградска Црвена звезда. Кариерата ја продолжи во Кајзериспор, а подоцна ја прифати понудата да биде селектор на Азербејџан.
Азербејџанците бележат солидни настапи со Просинечки во квалификациите за Светското првенство во Русија во 2018 година. Имаат седум бода колку и Северна Ирска на второто место во групата, пет помалку од Германија на челната позиција.