Турската полиција го приведе главниот уредник на опозицискиот секуларен весник Џумхуриет, Мурат Сабунџу и во моментов се врши претрес на раководството и новинарите на весникот, објавија турските медиуми.
Телевизијата Си Ен Ен Турк објави дека се издадени налози за апсење на вкупно 13 новинари и раководители на весникот Џумхуриет, вклучувајќи го и Сабунџу и претседателот на УП на весникот Акин Аталај, а еден новинар веќе е приведен во Анкара.
Провладиниот весник Јени Сафак на својата веб страница објави дека вработените во Џумхуриет се под полициска ситрага поради наводна поврзаност со мислиманскиот свештеник Фетула Ѓулен кој е осомничен дека е организатор на неуспешниот воен удар во јули годинава, како и дека е поврзан со курдските милитанти.
Претходниот главен уредник на весникот Џан Дундар е осуден на 6 години затвор поради објавување државни тајни, меѓу кои и информации за акцијата на Анкара во Сирија. Пресудата на Дундар предизвика критики и обвинувања за цензура, од страна на организации за човекови права и на западните влади.