Ибрахим Калин, портпарол на турскиот претседател Реџеп Таип Ердоган, изјави дека Турција бара од силите на сириската Влада да се повлечат од пограничното подрачје, за официјална Анкара да може да врати околу два милиона бегалци. Тоа ќе биде и една од темите на состанокот во вторник во Сочи меѓу Ердоган и неговиот руски колега, Владимир Путин.
„Ова е една од темите за кои ќе дискутираме со Русите, бидејќи ние нема да ги присилуваме бегалците да одат таму каде не сакаат. Сакаме да создадеме поволни услови за нивно враќање, услови во кои ќе се чувствуваат безбедно“, истакна Калин.
Сириските сили навлегоа во одредени делови во близина на границата со Турција, во согласност со курдските сили врз кои Анкара почна воени операции. Тоа ги наруши турските планови за создавање на „безбедносна зона“ на границата со Сирија, каде би можела да ги испрати сириските бегалци кои сега живеат во Турција. Таа територија претходно ја напуштија американските војници. Калин посочи дека бегалците не сакаат да се вратат во делови на Сирија, што се „под контрола на режимот“.