На денешниот протест на Македонското патриотско здружение „Тврдокорни“ и Македонските обединети сили пред Собранието против законот за употреба на јазиците беше запалено знамето на ЕУ.
Додека ова се случуваше, присутните пееја патриотски песни и извикуваа „Браво“.
Околу 1.500 демонстранти се собраа на како што беше највен мирен протест против законот со кој како што велат се „двојазичност, се губи македонскиот карактер на државата, но и самата држава“.
Тие велат дека излегле од патриотски побуди, за спас на Македонија, додавајќи дека нема да дозволат други да решаваат како ќе живеат.
Претставничка од здружението Тврдокорни тврди дека со сегашната политичка ситуација, го губиме јазикот, црквата и душата.
Демонстрантите ја отфрлаат и можноста за референдум за промена на име, а додаваат дека Законот за јазици ја спроведува т.н. Тиранска платформа.
ЦИВИЛ најостро го осудува, како што вели, ултранационалистичкиот карактер на јавните настапи и на социјалните мрежи со кој се карактеризираат Тврдокорните и сличните на нив.
Демократијата, смета ЦИВИЛ, подразбира слобода на изразувањето и право на протест, но и владеење на правото и почитување на човековите права и слободи.
– Ги повикуваме граѓанките и граѓаните да се воздржат од секакво насилство и говор на омраза, а организациите на граѓанското општество да ја поддржат нашата реакција против говорот на омразата и етничката омраза во земјата. Бараме институциите да преземат решителни мерки против сторителите на дела од омраза, како и против оние што шират или поттикнуваат говор на омраза, наведува ЦИВИЛ.
За ЦИВИЛ се крајно неприфатливи директните и индиректните повици на насилство, говор на омраза, клеветење и обвинување на институциите и на соседните држави за фашизам и други квалификации.
– Организаторите на протестот против Законот за јазици, со груба злоупотреба на човековите права и слободи, пред сѐ, на слободата на изразувањето и правото на протест, се обидуваат да предизвикаат меѓуетнички тензии и насилство, смета ЦИВИЛ.