Еден од организаторите на групата осомничени дека подготувала терористички напади во Црна Гора, Александар Синѓелиќ е уапсен, пишуваат црногорските медиуми.
Според весникот „Вијести“ Синѓелиќ е во затвор во Подгорица под сомнителни околности, додека „Дневне новине“ истакнуваат дека тој „во најголема тајност“ е уапсен пред два дена во Белград и во довните вечерни часови „под специјални мерки на безбедност, со хеликоптер на црногорските државни органи е донесен во Подгорица“.
„Вијести“ меѓутоа цитираат соговорник од Заводот за извршување кривични санкции според кого „никој официјално не се огласил“ во врска со апсењето и затоа „најверојатно се работи за договор меѓу него и оние кои раководат со истрагата“.
– Доколку е уапсен во Србија не би можел толку експресно да биде испорачан во Црна Гора, туку најверојатно сам би дошол по договорот со признание да ги „засили“ доказите на Обвинителството, вели соговорникот за Вијести.
Синѓелиќ заедно со пензионираниот генерал, бившиот шеф на српската Жандармерија Братислав Дикиќ, се осомничени за обид за терористички напад во Црна Гора во текот на изборниот ден на 16 октомври.
Тој пред неколку дена бил недостапен на надлежните органи, но според пишувањето на медиумите, се огласи преку порталот „Србија Денес“ и рече дека не е во бегство, туку дека се наожа во Белград, и дека во Црна Гора не бил од 2002. година.
Медиумите во Подгорица претходно објавија дека тој минатата недела е сослушан во Белград по налог на црногорскиот специјален обвинител.
Од уапсените 20 државјани на Србија, 14 се во затвор во Подгорица, а шестмина се пуштени на слобода. Синѓелиќ заедно со Дикиќ и Кристина Христиќ е осомничен за „тероризам во обид“, додека останатите се осомничени за организирање на криминална група.
Според Обвинителството, една од целите на оваа група била и атентат врз црногорскиот премиер Мило Ѓукановиќ.
“Постои основано сомнение дека на почетокот на октомври во Србија и Црна Гора е формирана криминална организација со цел да влијае на законодавната и извршната власт во Црна Гора. Постои сомневање дека планот на оваа организација е во текот на прогласувањето на изборните резултати со употреба на оружје, да ги нападнат граѓаните собрани пред Собранието на Црна Гора и службениците да полицијата и потоа да го завземат Собранието со намера да прогласат изборна победа на некои политички партии”, вели соопштението на обвинителството.
“Исто така посто сомнение дека планот на криминалната организација бил да го лиши од слобода премиерот на Црна Гора”, вели соопштението.
Српскиот премиер Александар Вучиќ денес изјави дека нема информации за ова апсење. Но, тој смета дека е “чудно што тоа се случува токму денес и тоа е се што можам да кажам”, рече Вучиќ.
Односите помеѓу Белград и Подгорица од време на време се тензични откако Црна Гора прогласи независност во 2006 година. Земјата исто така го призна Косов во 2008 година што предизвика големо разочарување во Србија кога, меѓу другото, не сака да стане членка на НАТО.
Славко Стојановиќ, шеф на црногорската полиција, изјави дека лицата биле уапсени во ноќта пред изборите а полицијата трага по уште едно лице.
Овие лица “ се осомничени дека стасале во Црна Гора со намера да земат оружје и извршат напади во ноќта по изборите против институциите, полицијата и претставниците на државните органи. Ние не исклучуваме ниту напади врз високи функционери на државата”, вели соопштението на полицијата.