Германската полиција го уапсила осомничениот за вмешаност во синоќешната експлозија во Дортмунд, соопшти Федералното обвинителство.
Главната обвинителка Фрауке Келе потврди дека истрагата се обидува да истражи дали се работи за можна „терористичка врска“, пренесува АФП.
-Двајцата осомничени од исламистички спектар се наоѓаат во фокусот на истрагата. Становите на двајцата им се претресени и еден од нив е задржан во притвор, вели Келе.
Агенцијата АП истакнува дека федералното обвинителство ги презема случаите кои се сметаат за сериозно, вклучувајќи ги и оние за кои има сомнение дека се од терористички мотиви.
Претходно полицијата објави дека истражува можна „исламистичка врска“ по повод нападот, откако на местото е пронајдено писмо каде се споменува нападот на божиќниот панаѓур во Берлин.
Во писмото се споменува и германската извидувачка мисија „Торнадо“ во рамки на меѓународната коалиција која се бори против Исламската држава, објавија неколку германски медиуми повикувајќи се на неименувани извори.
Портпаролката на полицијата Нина Фогт за ТВ станицата ЗДФ дека „истрагата мора да се движи во сите правци“.
Магазинот Форбс пак објави дека германските истражители испитуваат содржина и на друго писмо во кое се презема одговорноста за експлозијата. Наводно пораката е објавена на еден антифашистички интернет портал во која се тврди дека нападот е извршен во знак на одмазда поради „мекиот став“ на клубот кон неонацистичките и расистички изјави на навивачите.
Три експлозии се случиле во близина на автобусот на фудбалерите на Борусија Дортмунд, но немаше поголеми последици, бидејќи автобусот имал блиндирани стакла.
При експлозијата повреден е играчот Марк Батра. Тој синоќа бил опериран поради повредата на раката и дланката.
Автобусот се движел кон стадионот на клубот каде требаше да се одигра натпреварот од Лигата на шампиони против Монако.
Германската полиција претходно објави дека пронашла писмо во кое се презема одговорноста на овој напад, но не објави детали.