Ако се спореди овој резултат со резултатот од последните избори во октомври 2024 година, „Прогресивна Бугарија“ има привлечено огромен дел од гласачите на крајно лево ориентираната – русофилска партија Вазраждане/Преродба (12.92% во 2024) и Бугарската Социјалистичка Партија – БСП (наследник на БКП, со 7.32% во 2024), партии кои најверојатно нема да го поминат изборниот праг од 4%.
Тони Поповски
Повеќе од убедлива победа на „Прогресивна Бугарија“ на Румен Радев на собраниските избори во соседна Бугарија. Наспроти анкетите кои предвидуваа резултат од 27 – 30%, големото изненадување е дека на 68% од преброени гласови, според ЦИК, партијата води со дури 44.5%, резултат кој и обезбедува самостојно мнозинство.
Според наоди од паралелно пребројување на две агенции, на 100% преброени гласови (Маркет Линкс), „Прогресивна Бугарија“ има освоено 44.4% од гласовите, а според Мјара – на 95% преброени гласови, 45.3% од гласовите.
Победничката предизборна реторика на Радев беше насочена кон државата како гарант на стабилноста и социјалната сигурност, настапувајќи од позиции блиски на класичната (ретро) левица зачинето со патриотски прагматизам: државата треба да интервенира кога пазарот не функционира, институциите треба да се заштитат од корупција (и од олигархијата), а надворешната политика треба да биде внимателно балансирана (мирољубие, скептицизам кон „тврдата“ линија на Западот, особено кога станува збор за безбедносни прашања и односите со Русија).
Ако се спореди овој резултат со резултатот од последните избори во октомври 2024 година, „Прогресивна Бугарија“ има привлечено огромен дел од гласачите на крајно лево ориентираната – русофилска партија Вазраждане/Преродба (12.92% во 2024) и Бугарската Социјалистичка Партија – БСП (наследник на БКП, со 7.32% во 2024), партии кои најверојатно нема да го поминат изборниот праг од 4%.
Во Народното Собрание на Бугарија, се очекува да учествуваат и три други партии, коалиции: на 68% преброени гласови, центристичката коалиција Партија на промените & Демократска Бугарија има освоено 14% од гласовите (13,75% во 2024), ГЕРБ-СДС на Бојко Борисов е на 13.1% од гласовите што претставува сериозен пораз на партијата која беше победник на претходните избори во октомври 2024 со освоени 25.52%. Овој драматичен пад на поддршка за ГЕРБ-СДС е второто големо изненадување бидејќи анкетите им даваа цели 20-21% поддршка. Четврта партија е ДПС – Ново начало на контроверзниот бизнисмен Дељан Пеевски со 5.4%, со мерливо послаб резултат од тој во 2024 (11.13%).
Двете агенции врз основа на паралелно пребројување на гласови ги наведуваат следниве резулати за другите партии: ПП-ДБ (12.8 – 12.2%); ГЕРБ-СДС (12.4 – 12.1%); ДПС НН (6.3 – 7.0%) и Вазраждане/Преродба (3.8 – 4.2%).
Од Фејсбук ѕидот на авторот