Портпаролот на Одделот за јавна безбедност во Тексас, поручник Крис Оливарез, во разговор за CBS News детално го опиша настанот со пукањето.
Тој рече дека убиецот, познат како Салвадор Рамос на возраст од 18 години, откако ја застрелал својата баба во неговиот дом се упатил кон училиштето, влетувајќи таму со својот автомобил. Тој наишол на отпор од органите на редот кога влегувал во училиштето, но успеал да влезе во училницата за четврто одделение, каде што се забарикадирал и почнал да пука.
Оливарез го опиша ужасниот настан, објаснувајќи дека органите на редот го слушале како пука во училницата но немало како да влезат. „Во тој момент, примарен фокус беше да се евакуираат што е можно повеќе деца“, раскажува тој.
Тој опиша и дека додека се слушале пукотници во училиштето, наставниците во другите училници ги кршеле прозорците обидувајќи се да им помогнат на своите ученици да избегаат. Додека се случувало пукањето, полицајците оделе околу училиштето, кршеле прозорци и се обидувале да ги евакуираат децата и персоналот.
Органите на редот на крајот успеале да упаднат во забарикадираната училница каде што влегле во престрелка со напаѓачот кој бил убиен на лице место.
Загинаа 19 деца и двајца наставници – сите од училницата за четврто одделение.
Сите жртви се отстранети, идентификувани и нивните семејства се известени, рече поручникот. Биле ранети и повеќе деца во училницата, според Оливарез, но нема точна бројка во овој момент.
На прашањето дали училиштето било цел, Оливарез рече дека се уште има „многу неодговорени прашања“.
„Се обидуваме да го утврдиме тоа, затоа работиме со ФБИ во моментов за да погледнеме наназад да видиме дали има некои индикатори на социјалните мрежи. Она што го знаеме за напаѓачот е дека тој е жител овде во Увалде, посетувал едно од локалните средни училишта, живеел со баба му и дедо му, бил невработен, нема пријатели, нема девојка што можеме да ја идентификуваме во моментов, нема криминална историја, нема припадност на банди“, рече Оливарез. Тој додаде дека убиецот имал една пушка во негова сопственост кога влегол во училиштето, а властите работат на утврдување на типот на пушка и капацитетот.
„Носел и борбен елек какви што користат тактички тимови, тимови SWAT, каде што може да се стави дополнителна муниција“, изјави Оливарез.
Оливарез извести дека неговата баба – која напаѓачот претходно ја застрелал – се уште е жива и властите се обидуваат да го лоцираат неговиот дедо и членовите на потесното семејство. (Си-Ен-Ен, Гардијан)