Од Министерството за образование тврдат дека училиштата се целосно подготвени за прием на учениците со физичко присуство и дека нема ниту одложување на почетокот на учебната година, ниту менување на моделот. Првиот човек на Синдикатот за образование, наука и култура, Јаким Неделковски, во изјавата за Нова ТВ изјави дека „синдикатот целосно ја поддржува наставата со физичко присуство, бидејќи, како што вели, треба целосно да и се верува на Комисијата за заразни болести.Проф.Др.Пановски сугерира преполовување на паралелките бидејќи ирелевантно е ако се премине кон комбиниран модел, а во една паралелка има и по 34 ученици
За разлика од лани, годинава стартот на новата школска година ќе ги наполни со џагор училишните простории. Учениците се враќаат онаму каде што припаѓаат во училиштата, меѓу училишните клупи и табли.Еуфоријата расте со наближувањето на први септември, а овој пат таа е поголема поради едногодишното отсуство поврзано со Пандемијата од коронавирусот. Уште само два дена од стартот на новата учебна година, а училишните врати овој пат ќе бидат отворени и за основците и за средношколците. Според препораките на Главниот кризен штаб, наставата со физичко присуство ќе се одвива со полн капацитет и примена на соодветни антиковид-протоколи.
Пред влезот на училиштето на учениците ќе им се мери температура со безконтактен топломер, а доколку имаат температура над 37.4 нема да можат да влезат. Влез ќе биде дозволен само со заштитна маска и по дезинфекција на рацете за сите ученици и вработени во училиштето. Ова се само дел од правилата наведени во протоколот за постапување на средните и основните училишта за реализација на воспитно-образовниот систем, кој го усвои Владата на 24 август.
На влезот во училиштата, во училниците и другите простории треба да се постават средства за дезинфекција, заедно со едукативно-информативни материјали и насоки за заштита на здравјето и безбедноста во училиштето.
Според протоколот за следење настава со физичко присуство, наставниот час ќе трае 40 минути. Малиот одмор се користи во траење од 5 минути меѓу часовите и голем одмор во траење од 15 до 20 минути. За време на одморите потребно е да се намали колку што е можно повеќе физичкиот контакт меѓу учениците. Исто така за време на големиот одмор кога учениците се во училишниот двор, задолжително се спроведува чистење на училниците со вода и сапун, дезинфекциско средство и задолжително се проветруваат просториите.
Од Министерството за образование тврдат дека училиштата се целосно подготвени за прием на учениците со физичко присуство и дека нема ниту одложување на почетокот на учебната година, ниту менување на моделот. Од таму апелираат на највисока одговорност од сите засегнати во образовниот систем.
Првиот човек на Синдикатот за образование, наука и култура, Јаким Неделковски, во изјавата за Нова ТВ изјави дека „синдикатот целосно ја поддржува наставата со физичко присуство, бидејќи, како што вели, треба целосно да и се верува на Комисијата за заразни болести за создадените услови за почеток на новата учебна година“.
– Не радува податокот дека досега се вакцинирани над 60% од вкупниот број вработени во училиштата. Тука се и оние кои го прележале вирусот, така што верувам дека наставниците и вработените се заштитени од вирусот, вели Неделковски.
Тој смета дека со добра организација и почитување на протоколите, може да се оддржи наставата со физичко присуство, додавајќи дека единствената дилема им е околу тоа дали во училишните клупи ќе седат по еден или двајца ученици.
– Доколку седи по еден ученик во клупа, тогаш ќе имаме проблем со капацитетот на училници, па учениците ќе треба да се делат во две гупи. За синдикатот е неприфатливо наставниците да работат дупло и да предаваат на двете групи посебно, бидејќи се докажало дека тоа е пренапорно и претешко, вели Неделковски.
Според него, прифатливо решение би било оние ученици кои би биле дома, да ја следат истовремено наставата која се одвива во училиште.
Од друга страна пак, Проф. Др. Никола Пановски за Нова ТВ вели дека малку е доцна за градење на стратегии во врска со организацијата на наставата во основното и во средното образование, бидејќи според него, ова што го читаме како препораки веројатно се осмислени уште во јуни, во смисла ако се влоши состојбата, ќе се премине на комбинирана настава што е ирелевантно ако и со таа комбинирана настава во еден клас седат 34 средношколци.
– Наставата треба да се одвива комбинирано , односно половина клас да посетува настава со физичко присуство две недели, а другата половина следните две недели, па така ако има некој заразено од учениците, во изолација да одат, пример ако е класот 34 ученици, 17 а не сите 34 ученици, вели Пановски.
Професорот Пановски, очекува и со есенската појава и на веќе одомаќинетите вируси кои исто така се манифестираат со висока температура, ситуацијата уште повеќе да се усложни. Во случај ученик да развие температура и се потврди дека е од Ковид- 19, дали во излоација ќе одат сите ученици, независно што маските се задолжителни како и дезинфекцијата. Во вакви услови учебната година би траела една недела, низ шега вели Пановски.
Тој се надева дека поголем дел од од учениците се вакцинирани па придонесуваат за неширење на вирусот , а дека дел го прележале од „ нога“ или се имунизирале со масовните посети на концертите што се организираа по летните диска и сцени пред се во нашите туристички места.
Според предвидените протоколи на МОН, доколку во училиштето се појави заболен од коронавирусот или лице кои имало контакт со лице заболено од вирусот, тогаш лицето треба да се изолира во посебна просторија со задолжително носење на заштитна маска, а директорот е предвидено да воспостави комуникација со Центарот за јавно здравје.
Во меѓувреме пак, доколку ученик развие симптоми на коронавирусот додека е во училиште, наставникот или стручниот соработник го изолира ученикот во посебна просторија со задолжително носење заштитна маска и веднаш ги известува родителите или старателите, кои треба во најкратко време да го земат детето со консултација и понатамошни активности со матичниот лекар.
Поради високиот број заразени со коронавирус во Тетово и Гостивар, Комисијата за заштита од заразни болести, на барање на Општина Тетово, одлучи само средните училишта во овие градови да организираат онлајн-настава во првите две недели од септември.
Ослободени може да бидат ученици со ретки болести или попречености, деца од семејства со хронични болести, по барање од родителите, како и од други немедицински причини со дозвола на училиштето.
Слично решение побара и кризниот штаб на Општина Маврово и Ростуше, односно од надлежните побара наставата во основните и средните училишта во општината првиот месец од учебната година да се одвива онлајн, но засега се уште нема одговор на ваквото барање.
И.Р.