Второто полугодие ќе почне со физичко присуство, а по случаен избор ќе се тестираат ученици – ова го најави министерот за здравство Беким Сали денеска на вакциналниот пункт на Економскиот факултет каде ја прими третата доза вакцина против ковид.
– Според нашите податоци нема потреба од онлајн учење во овој момент затоа што епидемиолошката состојба се менува секоја недела, а врз основа на тие податоци ние ги носиме одлуките. Тоа значи дека од 1 февруари ќе се почне со физичко присуство во училиштата и како Министерство ќе преземеме превентивни мерки со случаен скрининг и зависно од регионот, градот или општината ако се појави епидемија, ќе се преземат мерки – изјави министерот, пренесе МИА.
Тој повика на одговорно однесување и почитување на протоколите во училиштата по најавите на здруженија на родители дека децата во училиште ќе ги праќаат без заштитни маски. Вчера и Синдикатот за образование, наука и култура побара од Владата уште еднаш да ја преиспита одлуката за почеток на второто полугодие со физичко присуство. СОНК бара во ситуација кога расте бројот на новозаболени, второто полугодие да почне со онлајн настава, а потоа согласно епидемиолошката состојба, да се почне со физичко присуство.