Денеска во раните утрински часови угинал еден од двата морски лава во скопската Зоолошка градина, известија од Зоолошката градина. Од таму велат дека не знаат која е причината за угинувањето на лавот.
„Не знаеме дали причините за угинувањето на морскиот лав се последица на ниските температури и временските услови. Морскиот лав е даден на обдукција на Факултетот за ветеринарна медицина. По добивањето на резултатите детално ќе бидете информирани“, пишува во соопштението на ЗОО Скопје.
Со реакција за овој случај излегоа и од здружението за заштита на животни „Анима Мунди“. Од здружението ги повикуваат сите љубители на животни да ги бојкотираат зоолошките градини.
Страдање, заробеништво и смрт. Тоа е судбината на животните во ЗОО Скопје. Сега во мистериозни околности им починал едниот од двата морски лава. Смртта на животното повторно е изненадување за одговорните и вработените, повторно никој не забележал ништо и повторно никој не чувствува вина! Ги повикуваме сите љубители на животните да ги бојкотираат зоолошките градини секогаш и секаде. Немојте да бидете соучесници, немојте со свои пари да го финансирате ропството на оние кои не згрешиле ништо, кои се осудени да умрат далеку од своите природни живеалишта, осудени никогаш да не почувствуваат слобода“, се вели во соопштението на „Анима Мунди“.