И покрај реакциите во јавноста, УЈП не се откажува од намерата со измени во Законот за банки да има 24 часовен увид во сметките на граѓаните. Ќе се следат уплатите, исплатите, но и депозитите на секој оној кој има трансакциска сметка во некоја од македонските банки.
Управата за јавни приходи електронски ќе ги добива од банките податоците за граѓаните неопходни за пополнување на Годишната даночна пријава, која од јануари следната година, наместо обврзникот, ќе ја пополнува Управата и ќе му ја доставува на обврзникот за потврда. Податоците што ќе ги доставуваат банките и кои ќе ги користи УЈП, како и динамиката на доставување ќе бидат утврдени со законски измени, рече денеска директорката на УЈП Сања Лукаревска која кажа дека и досега од банките добивале податоци но во хартиена форма за даночната постапка.
„Она на што се работи една година наназад е оваа размена на податоци да се автоматизира, наместо податоците да се доставуваат во хартиена форма, што е долга, спора постапка за сите страни. Автоматизираната електронска размена на податоци со банките ќе овозможи подобрување на ефикасноста на УЈП, подобри услуги за граѓаните и истовремено подобро администрирање на персоналниот данок на доход, кажа Лукаревска додавајќи дека со ова побрзо ќе се издаваат уверенија, решенија и други документи во надлежност на УЈП.
Од управата велат дека информациите ќе бидат заштитени и ќе се користат наменски.
„Нема да има службена злоупотреба од нашите вработени и не постојат банкарски тајни, според законот кај нас. Ќе се проверуваат приливи од странство и одливи за да се види како ќе се вкрстуваат тие податоци со даочните пријави“, рече Сања Лукаревска, директорката на УЈП.
„Од една страна има многу затајување на данок, а на државата и треба секој денар. Ама, од друга страна пак, ова и дава голема моќ на УЈП и може да се злоупотреби и од поединци во УЈП и на стотици други начини“ коментираат експерти за НОВА ТВ.
Од УЈП нема одговор како ќе се заштитат податоците доколку софтверот е нападнат или информациите паднат во раце на трети лица. Остро реагираа и од Асоцијацијата на банки:
„Увид во трансакциските сметки на клиентот претставува директна повреда на неговата приватност, навики, начин на живеење, со што може да се направи непоправлива штета доколку податоците бидат доставени до трети неовластени лица или бидат објавени во јавност. Ова може негативно да влијае на довербата на граѓаните во банките, која макотрпно се гради последниве 20-тина години“ – велат од Македонската асоцијација на банки.