Амбасадата на Украина, во соработка со македонската граѓанска организација ЦИВИЛ – Центар за слобода, денес спроведе голема конференција под наслов „Украина – две години хероизам“, во Музејот на македонската борба за независност.
Македонскиот претседател Стево Пендаровски и Амбасадорката на Украина Лариса Дир беа првите говорници на конференцијата, а по нив следеа обраќањата на премиерот Талат Џафери, вицепремиерите Бојан Маричиќ, Славица Грковска, министрите Бујар Османи и Славјанка Петровска и други високи претставници на државните институции.
Во втората сесија на оваа конференција говореа дипломатските претставници на ЕУ, САД, Велика Британија, Шведска, Албанија, Чешка, Франција, Јапонија, Германија, Полска и Литванија.
Во музејот беа поставени и две изложби. „Проект Украина: Доживување на војната“, електронска изложба со виртуелна реалност и „Поштенска картичка од Украина“, изложба на фотографии.
Во програмата беше вклучена и промоција на книгата „Украина – години на хероизмот“ од Џабир Дерала.
Настанот беше пренесуван во живо на медиумската платформа на ЦИВИЛ, на Фејбук профилот и Јутуб видео каналот на организацијата.