Уметничката формација Кооперација, која стана позната по изложбите во напуштени и алтернативни простори низ Скопје, најавува нов настан – изложбата „Утопии/ Дистопии: документи“.
Целта на овој најнов проект на Кооперација е да го отвори прашањето за идеализираните мега-проекции за иднината во општеството и (не)успехот на ваквите конструкти преку конкретни уметнички интервенции токму во јавниот простор како точка во која се вкрстуваат различните интереси, тенденции и интерпретации и ја конституираат општествената реалност.
„Во демократското општество сфатено како континуиран процес на постојано реконфигурирање, ваквите времени уметнички интервенции во јавен простор се од клучна важност, имајќи ја предвид способноста на уметноста на специфичен начин да ги обликува, одрази, критикува и редефинира идеалите и противречностите на/во општествениот контекст во кој самата делува. На тој начин, уметноста, која се противи на дефиниција и канонизација, единствено може да биде сфатена како платформа на истражување, преиспитување и артикулација на индивидуалниот говор и израз на плурализмот манифестиран во урбаниот предел исполнет со различни знаци и претпоставени значења, некогаш компатибилни, но и остро спротивставени.“, велат авторите од Кооперација
Овојпат Кооперација настапува во широк состав и со гости уметници од странство, со свои архиви за интервенции, акции и перформанси учествуваат: Мирна Арсовска, Ивана Драгшиќ, Александар Спасоски, Оливер Мусовиќ, Игор Тошевски, Харалд Шенкер, Инес Ефремова, Славица Тошевска, Дијана Богдановска, Тихомир Јанчовски, Владимир Неделковски, Ѓорѓе Јовановиќ, Јана Јакимовска, Никола Узуновски, Филип Јовановски, Данило Мандиќ, Владимир Јанчевски, Миле Ничевски, Даниел Гонц од Романија и Синиша Лабровиќ од Хрватска.
Изложбата е најавана за во сабота, 20 април, ќе биде отворена во 20 часот и ќе трае само 2 часа. Адресата е: Архитектонско студио „Архитектри“, ул. Франклин Рузвелт, бр. 68, 1/2 (прв кат).