Славниот Христо се врати на светската уметничка сцена со својата најнова инсталација – балон висок 91,5 метри наречен „Голем воздушен пакет“. За да се добие ефектот на балон биле потребни 20.000 квадратни метри проѕирна ткаенина и исклучително силни вентилатори.
Добиениот ефект, според зборовите на уметникот е: „како да пливате во светлина.“
Волфганг Волц, фотограф и проект менаџер, за ова најново дело на Кристо рече: „Како да сме во рајска одаја“.
Инсталација на Кристо, светски познатиот уметник чие име е Христо Јавашев е поставена во поранешена индустриска цистерна за нафта во Оберхаузен, Германија, и заинтересираните ќе може да ја видат до 30 декември.
Јавашев стана познат по тоа што предметите за секојдневна употреба како што се шишиња или столчиња ги виткаше во ткаенини и церади.
„Големиот воздушен пакет“ е негов прв проект по смртта на неговата сопруга и соработничка Жан-Клод, во 2009 година.
Заедно, оваа двојка беше позната по делата кои станаа вистински спектакли. Најпознатото дело на Кристо датира од 1995 година, кога ја обвитка целата зграда на германскиот парламент со 100.000 квадратни метри огноотпорна полипропиленска ткаенина. Оваа инсталација привлече пет милиони посетители.
За да го исполни ветувањето што го дал на неговата почината сопруга, 75 годишниот Кристо планира во Абу Даби да го направи осмото светско чудо, најголемиот споменик во на цивилизацијата. Се работи за пирамида висока 150 метри, направена од 410 илијади буриња за нафта. Тој монументален споменик би чинел околу 260 милиони евра.