До 10 часот утрово нема пристигнато ниту една тужба од политичка партија до Управниот суд по сите отфрлени 2.142 приговора од Државната Изборна Комисија (ДИК) за предвремените парламентарни избори, информира претседателот на Управен суд, Бурим Сејдини.
ДИК треба да достави решенијата до политичките партии за своите одлуки, по што почнува да тече 24 часовниот рок за поднесување на тужби. Како што информира портпаролот на ДИК, Адмир Шабани, решенијата за отфрлање на приговорите до 10 часот ги подигнале само претставници на Алијанса за Албанците и на Алтернатива.
По истек на пет часа од испраќањето, се смета дека примателите ги добиле решенијата, а Управниот суд има 60 часа да одлучува по приемот на тужбите.
„Подготвени сме да примиме тужби од овластени претставници на листите на кандидати за пратеници во текот на денешниот или утрешниот ден, меѓутоа, до овој момент нема поднесено тужби“, вели Сејдини.
Тој истакнува дека се преземени сите активности и мерки за судот да функционира во целиот свој капацитет.
„Извршена е ждрепката на Советите за одлучување по избори, така што, убедени сме дека Управниот суд ќе успее навремено да ги изврши своите законски надлежности, а тоа е да донесе одлуки по поднесените тужби и да имаме официјални конечни резултати по одржаните предвремени парламентарни избори“, рече Сејдини.
Тој повтори дека се прават напори да се организираат и судот да постапува најефикасно што може. По одлуката на Управниот суд и добивањето на евентуалните одлуки од Уставниот суд, за заштитата на избирачкото право, во ДИК, согласно законот, Комисијата ќе ги објави официјалните конечни резултати од предвремените парламентарни избори. Потоа ДИК ќе им издаде уверенија на избраните пратеници. Крајот рок за одржување на конститутивната седница на Собранието е 4 август.
Тужби до Управниот суд најавија полтичките партии ВМРО-ДПМНЕ, коалицијата Алијанса на Албанците и Алтернатива, Левица и Интегра.