Ураганот „Ијан“, кој ја зафати Флорида и беше придружен од силни ветрови и обилни врнежи од дожд, предизвика катастрофални поплави и прекин на електричната енергија низ таа американската сојузна држава.

„Ураганот, проследен од ветрови со бризина од 185 километри на час, стигна на брегот на Кајо Коста, во југозападна Флорида, во 15:05 часот по локално време (21:05 часот по средноевропско време)“, наведе Националниот центар за урагани на САД (NHC).

Иако беше во четврта категорија од можни пет на скалата Сафир-Симпсон, сега ураганот „падна“ во понизок ранг (трета категорија), но, сепак, има разорна моќ, наведува истиот извор.

„Речиси два милиона домови во Флорида останаа без струја, а повеќето од нив се наоѓаат во близина на патеката на ураганот“, јави специјализираната веб-страница PowerOutage.

Неколку окрузи во близина на местото каде што „Ијан“ удри на копното се речиси целосно без струја, наведува веб-страницата.

Градот Пунта Горда е целосно во темнина. Во текот на ноќта беа осветлени само зградите кои се опремени со генератори, а единственото нешто што се слушаше беа свирежите на ветрот и врнежите од дожд.

Во градот Наплес, во југозападна Флорида, улиците беа под вода, а поројот носеше автомобили, покажуваат снимките на телевизијата „Ем-Ес-Ен-Би-Си“.

Во градот Форт Мајерс, поплавите се толку големи што некои населби наликуваат на езера.

Оваа метеоролошка појава во текот на денот се очекува да се придвижи кон внатрешноста на копното и вечерва да пристигне над западниот Атлантик, наведе НХЦ. Со минување преку копното, ураганот треба да ослабне, но сепак може да предизвика значителна штета додека не стигне до источна Флорида, додаваат оттаму.

Гувернерот Рон Де Сантис синоќа изјави дека ова најверојатно ќе биде „еден од петте најразорни урагани што некогаш ја погодиле Флорида“.

„Ова е бура за која ќе се зборува многу години“, рече директорот на НВС, Кен Греам, на прес-конференција.