Можеби во Будимпешта процениле дека со унгарскиот кредит, македонските граѓанки и граѓани веќе немаат потреба да летаат со нискобуџетни авиокомпании.
Драган Мишев„Многу сум горд на оваа работа бидејќи направивме целосна промена на политиките на подршка на субвенционирање. Претходно за жал двата аеродроми тонеа неколку години, а пред тие години беа шампиони во регионот. Од ситуација на шампиони дојдовме до ситуација да тонат, но мислам дека се повторно ќе го вратат стариот сјај. Имаме 9 нови авиолинии за само пет месеци од кога ја почнавме оваа процедура, изјави кон крајот на Јануари 2025 година вицепремиерот и министер за транспорт, Александар Николоски.
Тој додаде дека очекува оваа политика на финансиска подршка да го зголеми квалитетот и бројот на патници на домашните аеродроми.
Ууупс…
Утрово не само ниските минусни температури и замрзнатите цени го фрапираа вицепремиерот. Студениот сабајлечки туш дојде од неколку македонски медиуми кои на своите страници објавија дека унгарската нискобуџетна авиокомпанија „Визер“ од 9 март ја укинува линијата Скопје–Будимпешта, без официјално објаснување дали ќе ја врати во октомври.
Од утрово, на страницата за резервации на авиокомпанијата, веќе не може да се купат карти за главниот град на Унгарија по 9 Март.
Инаку, ова е седма укината линија во последната година откако министерот за транспорт „ со гордост“ вети дека повторно ќе го вратии стариот сјај на двата македонски аеродроми. На 9 -те нови авиолинии за само пет месеци со кои се пофали Николовски, има седум помалку, по Салцбург, Бремен, Келн, Копенхаген, Стокхолм-Скавста и Луксембург, еве сега од листата на тестинации ја снема и Будимпешта.
Вицепремиерот и министер за транспорт, никако да сфати дека прво треба да скокне, па да рече – ОП.
ЦИВИЛ Медиа веќе еднаш упати повик да му се помогне на министерот Николовски да изброи со колку линии на нискобуџетниот Визер го збогатил небото над Македонија, откако помпезно најави дека од аеродромите во Скопје и во Охрид, со нискобуџетната Визер ќе се лета до 4 (четири) нови дестинации: три од скопскиот аеродром, до Барселона, Лион и Штутгарт, а од охридскиот аеродром Николовски најави лет со Визер до Базел.
Несреќниот Николовски, само што најави три нови летови од скопскиот аеродром со компанијата Визер напролет, а унгарската нискобуџетна авио-компанија веќе со стапување на сила на зимскиот распоред укина три авиолинии, три авиолинии од Скопскиот аеродро: за Келн, Копенхаген и Стокхолм.
Или, математички прецизно, како што милуваше да мудрува премиерот и шеф на Николовски:
3 – 3 = 0 нови авио линии на Визер од Скопје.
Несреќниот Николовски навистина нема среќа. Или можеби не е до среќата. Можеби во Будимпешта процениле дека со унгарскиот кредит, македонските граѓанки и граѓани веќе немаат потреба да летаат со нискобуџетни авиокомпании. Како и да се сврти, сите авиолинии (не)водат кон Будимпешта.
Текстот е сопственост на ЦивилМедиа