Претседателката на Уставниот суд Добрила Кацарска попладнево напиша алармантно писмо до две адреси. Првата е претседателката на Судскиот совет Павлина Црвенковска а втората адреса е претседателот на Собранието Талат Џафери поради надлежноста на парламентот за избори на уставни судии.
Во писмото Кацарска ги известува дека на 8 декември истекува мандатот на уште еден уставен судија и предупредува дека судот работи на граница на кворум.
„Ве известувам дека мандатот на Вангелина Маркудова, судија на Уставниот суд на Република Северна Македонија истекува на 7 декември 2022 година. Согласно ова, исполнети се условите за започнување на постапка за утврдување предлог за избор на нов судија на Уставниот суд“, вели Кацарска во двете писма кои беа доставени и до сите медиуми.
Кацарска притоа реагира и на доцнењето на избор на нови уставни судии, постапка која трае речиси година и пол поради политичките конфронтации во парламентот околу персоналните решенија.
„Без да навлегувам во надлежностите и начинот на работа на Судскиот совет, сакам да укажам на потребата од благовремено утврдување предлог за избор на нов судија. Во прилог на ова е и сегашната состојба во Судот којшто работи на граница на кворум поради неизбирањето на останатите четворица судии од страна на Собранието, на што се чека веќе 17 месеци. Следствено на ова, доколку со истекот на мандатот на судијата Маркудова, продолжи алармантната состојба во Уставниот суд, државата ќе се најде во уставна криза. Како последица на тоа, ќе нема услови за одржување на седници и Судот ќе биде оневозможен да врши контрола на законите и прописите и да ги штити правата и слободите на граѓаните“, пишува Кацарска во писмата.