Собранието доцна попладнево со 61 глас „за“ и 2 „против“го изгласа Ребалансот на буџетот. На гласањето не присуствуваа пратениците на ВМРО-ДПМНЕ во знак на протест, на како што рекоа, кратењето на капиталните инвестиции, и неприфаќањето од власта на ниту еден од нивните амандмани. Тие пред напуштањето на салата ги поставија транспаренти пред собраниската говорница.
На гласањето му претходеа 10 дена комисиска и пет дена пленарна расправа, на која владејачкото мнозинство и опозициските пратеници жестоко ги претставија своите аргументи.
ВМРО-ДПМНЕ најмногу критикуваше за кратењето на капиталните инвестиции, поради што, тврдат тие, овој буџет е неразвоен, нереформски, и нема да
донесе подобрување на животниот стандард на граѓаните.
Опозицијата тврдеше дека се крателе и срeдства кај образованието, здравството, туризмот, слободните зони, градежништвото, научната дејност.
Пратеникот Илија Димовски обвини дека тие нема да гласаат за буџетот бидејќи владејачкот мнозинство не покажало демократија и инклузивност, со одбивање на сите поднесени амандмани.
Според министерот за финансии, Драган Тевдовски пак, ребалансот претставува прв чекор кон градење на подобро општество бидејќи тој предвидува ограничувања и кратења поради зголемениот јавен долг.
Според него, ребалансот ги крати непродуктивните трошења на Владата и институциите за 122 милиони денари, но и други расходи за 257 милиони денари.
Тој тврди дека со ребалансот, тие ќе бидат на највисоко ниво досега. На пратениците им се заблагодари за достоинствената дебата, без навреди и омаловажувања.
Со ребалансот се скратени околу 47 милиони евра, според власта, непродуктивни трошења, за лускузирање и комодитет на претходните функционери.
Ребалансот се темели на проекција на раст на БДП од 2,2 отсто, буџетски дефицит на 18,57 милијарди денари, додека вкупните приходи се ревидирани за 2,87 милијарди денари и капиталните расходи се ревидирани на 23, 4 милијарди денари.