Изложбата „Скопска градска општина“ на авторката Јасмина Дамјановска ќе биде отворена утре во Музејот на град Скопје по повод 13 Ноември – Ден на ослободување на градот Скопје.
Изложбата, како што најавуваат организаторите, е замислена како водич низ меморијата што ја има собрано на едно место Државниот архив – Одделение Скопје за постоење и за дејствување на Скопската Општина, но и за трансформацијата што му се случува на градот Скопје со нејзиното конкретно функционирање.
Низ 22 паноа и околу 300 документи и фотографии ќе биде претставен периодот од крајот на 19. век, кога функционирала Скопската Турска Општина, потоа Градското поглаварство на Општината на град Скопје 1918 – 1941 год., Скопската Општина 1941 – 1944 год. и Скопската Општина преку градоначалниците од 1944 до денес.
Говорници на настанот се Татјана Сапунџиовска-Алексоска, раководител на Државниот архив – Одделение Скопје и авторката Јасмина Дамјановска. Во рамки на настанот, како што е најавено, ќе биде претставена уште една изложба на автори од Музејот на град Скопје.
На овој начин, од Државниот архив информираат дека се вклучува во одбележувањето на 13 Ноември – Ден на ослободување на градот Скопје, кој воедно е патронен празник на Државниот архив – Одделение Скопје.