Момче со пиштол уби три деца и жена во семејна куќа во населбата Грантсвил во САД. Петтото застрелано лице е хоспитализирано и надвор е од животна опасност. Детето што пукаше е уапсено.
Полицијата ги утврдува сите околности на најновата пукотница во САД што ја потресе јавноста. Извори од истрагата веруваат во сродство на жртвите, но одбиваат да излезат со повеќе информации за момчето што пукаше со оглед дека се работи за малолетник.
„Се обидуваме да бидеме сигурни во фактичката состојба и ги проверуваме односите меѓу напаѓачот и жртвите. Мотивите засега се непознати“, изјави Ронда Филдс од полицијата во Грантсвил, недалеку од Солт Лејк Сити.
Фото: deseret.com
Повеќекратното убиство е прво во Грантсвил во последните 20 години. Момчето се соочува со 10 обвинувања од кои најтешкото е за убиство, нагласуваат од полицијата. Тој, воедно, е единствен осомничен во трагичниот настан, а имињата на жртвите, според агенцијата АП, ќе бидат објавени во понеделник.
Фото: washingtontimes.com
Полицијата одговори на повикот за пукотница во Грантсвил во петокот во 19 часот по локално време. Полицајците во куќата пронајдоа тела на две девојчиња, на момче и на жена додека момчето кое пукаше и петтата негова жртва веќе беа превезени во болница. Повреденото дете е во стабилна состојба и се очекува да се опорави од повредите со огнено оружје.
Момчето напаѓач, пак, беше уапсено во болница и задржано во затвор за малолетници. Училиштето во квартот Туели понуди психолошка помош за сите вознемирени деца. Гувернерот на Јута, Гери Херберт упати апел до семејствата за обезбедување на огненото оружје што го поседуваат.
„Сите цврсто прегрнете ги своите најблиски и запаметете дека љубовта, а не омразата, ќе ги излекува скршените поединци и семејства“, напиша Херберт на Твитер.
