„Борбата против корупцијата е еден од главните приоритети на амбасадата – и клучен приоритет на Белата куќа за Западен Балкан. Соединетите Држави се многу насочени во борбата против корупцијата и подобрување на напорите за владеење на правото во Северна Македонија. Ја гледаме вредноста во инвестирањето во иднината на Северна Македонија преку притисок за подобрена владина транспарентност и одговорност“, рече денеска вршителот на должност амбасадор во американската амбасада во Македонија, Ерик Мејер, во своето обраќање на завршната конференција на проектот Мониторинг на националните акции за борба против корупцијата што го спроведува Институтот за човекови права.
„Но, јас не го кажувам сето ова – и не ги правиме овие значајни инвестиции – исклучиво во корист на американските интереси. Нашиот фокус и нашата цел се да помогнеме да се создаде подобра иднина за граѓаните на Северна Македонија. Граѓаните на оваа земја заслужуваат институции кои работат за нив и тие заслужуваат иднина цврсто вкоренета во добро владеење и силно владеење на правото“, порача тој.
„Премногу често слушам во моите разговори со брилијантни, ветувачки млади луѓе низ Северна Македонија дека се разочарани од институциите на нивната земја и се надеваат дека ќе ги пренесат своите вештини во странство. Тие се разочарани од недостатокот на можности овде и од она што го гледаат како нерамномерно поле за игра кое бара политички врски за да напредуваат – или, уште полошо, дека овие политички врски ќе ги поткопаат напорите за позитивни промени“, рече Мејер.
Тој упати и подиректна порака: „Недостасува огромно парче во антикорупциската сложувалка во Северна Македонија. Земјата мора да најде начин да ги разбие заднинските политички мрежи кои овозможуваат цветање на корупцијата. Мора да постои вистинска политичка волја да се запрат овие мрежи. Досега, напредокот на овој фронт сериозно недостасуваше“, рече американскиот претставник.
Тој подвлече дека ако моќните политички интереси го поттикнуваат институционалното, како што рече, однесување и ако познати корумпирани актери останат влијателни, тогаш ни претстои екстремна тешка битка.
„Распадот на корумпираните мрежи е најтешкиот предизвик пред нас. Но, тоа е најважниот двигател на вистински промени во Северна Македонија и во Западен Балкан. Ќе биде потребна политичка храброст, но јас цврсто верувам дека оваа земја може и треба да биде на висина на задачата. Претседателот Бајден ја нарече корупцијата „рак“. Да не дозволиме да продолжи да ја мачи Северна Македонија -земја која е пријател, сојузник и наш стратешки партнер“, подвлече амбасадорот Мејер.