Светската здравствена организација (СЗО) предвидува дека најранливата популација, како што се повозрасните лица, секоја година ќе треба да примат дополнителна доза на вакцина за заштита од сите соеви на коронавирусот, се вели во внатрешен документ во кој имале увид западни агенции.
Што се однесува до општата популација, се проценува дека ќе треба дополнителна доза на секои две години.
Таа проценка е вклучена во извештајот што треба да се дискутира на состанокот на Глобалната алијанса за вакцини (ГАВИ) која управува со програмата на СЗО, Ковакс.
Не е наведено како е донесен тој заклучок, но според основното сценарио, нови варијанти на вирусот ќе продолжат да се појавуваат и вакцините ќе треба редовно да се унапредуваат.