Претседателот на Собранието, Африм Гаши, во рамките на официјалната посета на Ватикан по повод традиционалната манифестација „Во чест на Свети Кирил и Методиј“, каде што ја предводи државната делегација на Македонија, се сретна со поглаварот на Светата Столица, папата Лав Четиринаесетти.
Како што објави на Фејсбук, Гаши му ги пренел честитките по повод годишнината од неговиот избор, а на средбата било разговарано за важноста на дијалогот, разбирањето и градењето мостови на соработка меѓу народите и културите.
На средбата биле потврдени традиционалните и пријателски односи меѓу Македонија и Светата Столица. Притоа била нагласена посветеноста на земјата на меѓуетничкиот, мултикултурниот и меѓурелигискиот соживот, како модел што ја зајакнува стабилноста и солидарноста во регионот.
Гаши и папата Лав Четиринаесетти разговарале и за универзалното наследство на светите Кирил и Методиј, како и за хуманизмот на Мајка Тереза, кои, како што било истакнато, остануваат трајна инспирација и мост што ги поврзува луѓето преку заедничките човечки вредности.