Култниот документарен филм „Скопје ’63“ на режисерот Вељко Булајиќ, вечерва, во 20 часот, во Куршумли-ан, ќе го означи почетокот на четвртото издание на фестивалот на креативен документарен филм „МакеДокс“.
„Скопје ‘63“ претставува авторски поглед и коментар на настаните непосредно пред, за време и по катастрофалниот земјотрес што го погоди Скопје на 26-ти јули 1963 година. Преку изворни материјали и со совршено вклопени инсценации се прикажани разурнувањата и последиците од земјотресот, расчистувањето на урнатините, последниот поздрав со загинатите, помошта што Скопје ја прими од земјата и од странство и обновата на градот.
Веднаш потоа следува проекција на оскаровскиот документарец „Барајќи го Шугармен“ на режисерот Малик Бенџелао, со кој ќе почне и натпреварувачката програма на фестивалот.
Филмот е посветен американскиот пејач и текстописец Сиксто Родригез. Иако неговите албуми се продадени во околу 500.000 копии (и тоа во земја полна со забрани), Родригез останува мистерија. Приказните за него одат дотаму што некои велат дека на концерт во САД самиот се запалил на сцена, па дури и дека починал. Иако денес важи за еден од најголемите таленти на своето време, тој ја завршува својата кариера нечујно, несвесен за сопствената популарност во другите делови на светот. Дваесет и пет години подоцна, кога ќе излезе вториот албум на Родригез, двајца негови обожаватели тргнуваат во неверојатна авантура, во потрага по вистината за овој мистериозен музичар и за рекордната продажба на неговите албуми.
0 коментари