Оценувачката комисија на 49. МТФ „Војдан Чернодрински“- Прилеп, во состав Васе Манчев претседател и членовите Братислав Димитров и Мустафа Јашар, одлучи дека претставата на Македонскиот народен театар „Вечната куќа“, работена на текст на Јордан Плевнеш а во режија на Дејан Пројковски, е апсолутен победник на годинешното издание на Македонскиот театарски фестивал кој денес завршува во Прилеп.
Покрај наградата за уметничко остварување во целина, претставата „Вечната куќа“ се закити со уште 9 други награди:
Награди за најдобра главна машка и женска улога им беа доделени на актерите Тони Михајловски и Искра Ветерова, Дејан Пројковски за режија, Јордан Плевнеш за текст, Дарја Ризова за млада актерка, Валентин Светозарев за сценографија, Благој Мицевски за костими, Горан Трајковски за музика и Сташа Зуровац за кореографија и сценски движења.
.jpg)
Преостанатите награди им припаднаа на Андон Јованоски од прилепскиот Народен театар „Војдан Чернодрински“ за машка епизодна улога во претставата „Швејк во Втората светска војна“, Валентина Грамосли од битолскиот Народен театар за женска епизодна улога, додека Атанас Атанасовски од „Театар Комедија“ од Скопје ја доби наградата за најдобар млад актер.
Наградата за современа сценска драматизација ѝ беше доделена на Викторија Рангелова за драматизацијата во претставата на театарот од Струмица, додека Владимир Ѓорѓијоски го изработи најдобриот плакат за претставата на Народниот театар „Војдан Чернодрински“ од Прилеп.
Со доделувањето на наградите, вечер во Центарот за култура „Марко Цепенков“ во Прилеп ќе биде спуштена фестивалската завеса, а во чест на наградените, ансамблот на „Театар Комедија“ ќе ја изведе претставата „Стјуардеси“.