Поетот, литературен критичар и универзитетски професор Д-р Веле Смилевски е избран за член на руската Академија на науките и уметностите.
Во одлуката на руската академија на науките и уметностите, потпишана од претседателот на академијата, проф. д-р Виктор Никеров, се наведува дека изборот е извршен врз основа на “достигнувањата и заслугите во областа на литературата и уметничката критика, како и за придонесот на Веле Смилевски во развивањето на македонско-руските културни врски”.
Веле Смилевски бил руски стипендист на универзитетот Ломоносов во Москва. Предмет на неговите истражувања биле методите на руската формалистичка школа, оригиналните ракописи од заоставнината на македонскиот поет Рајко Жинзифов, како и темата Македонија во делото на познатиот руски публицист, научник и политичар Павел Миљуков. учествувал на меѓународните научни конференции посветени на руската литература, одржани во Москва, Охрид и Софија.
Веле Смилевски е добитник на орденот “Сергеј Есенин” што го доделува московската организација на Сојузот на писателите на Русија.
Ова признание македонскиот поет го доби за стихозбирката “Забранета книга”, објавена на руски јазик во издание на издавачката куќа “У никитих ворот” од Москва.
Стихозбирката “Забранета книга” на руски се појави минатата година во препев на Олга Панкина, а со предговор на академик Ала Шешкен.
Веле Смилевски е татко на проминентниот писател Гоце Смилевски кој за романот „Сестрата на Зигмунд Фројд“ во 2010 година ја доби Наградата за литература на Европската Унија.
Правата за објавување на романот „Сестрата на Зигмунд Фројд“ се откупени од издавачи од Соединетите Американски Држави, Велика Британија, Франција, Шпанија, Италија, Португалија, Бразил, Холандија, Србија, Хрватска, Бугарија, Израел, Унгарија, Норвешка, Данска, Турција, Словенија и Чешка.