Во текот на сведочењето Велибор Манев, обвинет за убиство на Вања и Панче, денеска пред Судот изјави дека претрпел тортура при испитувањето од службените лица. Тој истакна дека рекол оти Палевски и таткото на Вања, Александар Ѓорчевски, се слушнале, само за да престанат да вршат тортура врз него, дополнувајќи дека Ѓорчевски е трето лице кое воопшто не било вмешано во случајот.
За во Скопје за да почнам да зборувам побарав адвокат, тие не сакаа ништо да слушнат, почнаа физички да ме малтретираат, да ме тепаат и да ме газат, за да почнам да зборувам. Еден од инспекторите ми пријде, ми покажа слика од машка особа, ми вика дали го познаваш, јас му велам никогаш го немам видено, ниту го имам контактирано тој човек, тој ми вели ова е таткото на детето. Дали сум го слушнал да разговара Љупчо Палевски дали разговара со детето. Јас му реков дека ниту сум слушнал, ниту знам, Палевски со кого разговарал, ниту можам да му бидам секретарка, да знам со кого прави муабет, рече Манев.
Тој додаде, „тука почнаа уште појако да ме тепаат, кажи, па кажи дека сум видел дека Љупчо Палевски разговарал со таткото. После тортурата, си велам ако имаат толку докази, ќе им кажам дека се слушнале само да прекинат со тортурата што ја вршеа врз мене.”
Манев исто така изјави дека комуникацијата со обвинетите најчесто се одвивала преку Телеграм, и дека Палевски постојано правел групи на оваа платформа. Тој потврди дека биле користени медицински маски за да се прикријат лицата при грабнувањето.
Во однос на прашањето од обвинителката за тоа дали имало објекти на местото каде што било пронајдено телото на Вања, Манев изјави „Во лозјата што не беа обработувани, на самото место тоа не беа објекти големи, мали собчиња, три на три, бетонирани.”
Тој негираше дека претходно ја ископал дупката на тоа место.
Прашан зошто не се откажа од второто грабнување, одговори дека му било страв.
Ми беше страв затоа што бев под закана дека ќе ме отепа мене и мојата фамилија ако не му ја завршам до крај работата, рече тој.
Воедно, обвинителката го прашуваше дали е точно дека во текот на распитот пред ОЈО и пред судијата на претходна постапка кај него можело да се забележат повреди, тој одговори дека цело време бил под притисок и закана на инспекторите.
Бев под тортура, не само од инспекторите, тортурата продолжи и во затворот, влегуваа по тројца четворица дневно, ме удираа со палки и си заминуваа. Во меѓувреме влегуваа други службеници, кои продолжуваа со распит што како зошто. На плочките бев скоро здрвен, бидејќи лежев на земја на обичен сунгер, се префрлив полека на сунгерот, кога ѕирнаа да видат дека сум префрлен ги слушнав како ѕирнаа и рекоа „еве го добар е, се освестил“. Кога ме однесоа на вториот распит, каде што бев сниман, ме прашаа дали ми треба медицинска помош и нешто слично. Бев под закана да не зборувам за тоа што и како се случувало и покрај тоа, после распитот ризикував, побарав да бидам врзан за радијатор и да останам насамо со обвинителката која ќе биде на безбедна оддалеченост од мене за да не можам да ѝ наштетам, за да ѝ кажам ситуацијата во која се наоѓам и присилата на која сум натеран да зборувам, образложи Манев.
Обвинителството потоа побара од судот поради различен исказ, да се прочита исказот даден во ОЈО Скопје кој се чита во моментов.
Од исказот во ЈО, Манев рекол „јас од Влатко имам слушнато дека се јавил таткото на девојчето Александар и зборувал со Љупчо, јас не знаев тогаш за што разговараат и дека се работи за неговата ќерка“.
Според исказот во ОЈО, Манев навел дека Палевски разговарал со Вања, ја прашал кои ѝ се родители и кој и бил дедо, побарал контакти од нејзините родители, таа му ги дала. Му кажала дека имаат стан во Охрид и неколку станови во Скопје.
Од тато не барај, тој не нѐ сака, од мама ќе бараш, таа сѐ што ќе има ќе даде за мене, посочил Манев, дека така одговорила Вања.