Собранието на Република Македонија по скратена постапка ги усвои измените на Законот за земјоделско земјиште по скратена постапка. Гласаа само 63 пратеници, од кои 61 гласаа „ЗА“, што претставува минимален број гласови за законот да биде изгласан.
Со ова, беше изменет еден став во законот кој велеше дека „земјоделското земјиште во државна сопственост не може да биде предмет на продажба“, при што сега ова земјиште „може да биде предмет на продажба под услови и на начин утврдени со закон.“
СДСМ ја бојкотираше расправата и гласањето и тоа и на овој закон и на законот за абортус. Пратеникот на СДСМ, Оливер Спасов, во име на опозициската партија рече дека таа не сака да учествува во „самоволието на ВМРО-ДПМНЕ“:
– СДСМ нема да учествува во расправата на оваа седница од едноставна причина заради тоа што не сакаме да учествуваме во самоволието на ВМРО-ДПМНЕ и на владејачката структура во носењето на овие два исклучително значајни законски проекти за Република Македонија и за нејзините граѓани. Пред се, заради тоа што сметаме дека не се водат од интересите на граѓаните туку исклучиво од тесно партиски интереси и интереси на мала група на луѓе во раководство и околу раководство на ВМРО-ДПМНЕ, притоа без да се води сметка за вистинските земјоделци и за граѓаните кои што живеат од земјоделско земјиште во Македонија – смета Спасов.
Единствен кој расправаше за законот од редовите на опозицијата беше Ивон Величковски од Либералната партија. Тој за НОВА вели дека земјиштето е основен ресурс за земјоделското производство кое сочинува 20 отсто од бруто домашниот производ и дека законот ваков каков што е ќе донесе многу проблеми.
– Во моментов ние имаме завршено само првостепена постапка на процесот на денационализација, но во втор степен постапките се уште траат. И тоа фактички значи дека државата може да продава земјиште кое е во фаза на обжалување во рамките на процесот за денационализација. Значи, луѓето повторно можат да бидат казнети и да им биде одземено нешто што би можеле да го добијат назад со процесот на денационализација.
Величковски смета и дека со ова ќе се создаде нова партитократија околу власта зашто таа ќе ги има сите предности при купувањето на земјиштето:
– На овој начин странски државјанин сега ќе може да купи земјоделско земјиште дури седум години откако ќе влеземе во Европската унија. Ако целта е да дојдат до земјиште лица кои ќе се занимаваат со земјоделство, тогаш продажбата за странци од ЕУ треба да биде отворена порано. Со ова не се нуди суштинска основа, врз дефинирана сопственост на земјиште, за развој на земјоделското производство, а со тоа и за развој на конзервната и индустријата за преработка на храна. Тоа значи дека ова нема да го има посакуваниот ефект. Сега со ова законско решение ќе купува земјиште кој има пари. Се создава иста средина и исти последици како непромислениот начин на приватизација во 90-тите години. Го поддржуваме концептот на приватна сопственост, но се создаваат услови мала екипа, владина или политичка олигархија, да одлучува за прашања од кои ќе зависи профитот и производството од земјоделското земјиште.
На прашањето зошто токму сега се прави ова и дали на власта сега набрзина и требаат пари со оглед на тоа што буџетот не се полни според очекуваното, Величковски вели:
– Како и при секоја приватизација, приливот ќе биде еднократен. Со создавањето на ваков законски акт треба да се овозможи експлоатација на земјиштето која редовно ќе носи профит. Мислам дека на овој начин не се постигнува тоа.