Велика Британија за првпат ќе испрати проектили со долг дострел во Украина, откако Русија, за првпат од април, ги погоди преградијата на Киев, јави агенцијата ДПА.
Според министерот за одбрана Бен Валас, земјата ќе испрати системи М270, што можат да истрелат прецизни ракети до 80 километри, подолг дострел од која било ракетна технологија што сега се користи во војната.
„Ако меѓународната заедница продолжи со поддршката, јас верувам оти Украина може да победи. Со промената на руската тактика, мора да се смени и нашата поддршка за Украина. Овие високо способни ракетни системи за повеќекратно лансирање, ќе им овозможат на нашите украински пријатели подобро да се заштитат од бруталната употреба на артилерија со долг дострел, што силите на Путин ја користеа неселективно за да уништат градови“, тврди Валас во соопштението, објавено од британското Министерство за одбрана.
Агенцијата ДПА појаснува дека украинските војници ќе бидат обучени во Велика Британија како да ја користат опремата.
Министерството за одбрана додава и дека одлуката била координирана со американската Влада, која исто така најави испорака на артилериски ракетни системи со висока мобилност за Украина.
Кога САД соопштија дека ќе испратат проектили со долг дострел, рускиот претседател Владимир Путин вети дека ќе погоди нови цели.
„Доколку тие се доставени, ние ќе извлечеме соодветни заклучоци од тоа и ќе употребиме наше оружје, што го имаме доволно, за да се удрат објекти што сè уште не сме ги погодиле“, изјави тој во интервју во петокот.
Жителите на Киев вчера се разбудија со првите руски напади на главниот град на Украина од 28 април.