Во Венецуела се одржуваат општински избори, каде на сила е традиционалниот таканаречен „сув закон”, односно забрана за точење алкохол за време на изборниот ден, соопштија локалните власти.
Повеќе од 19 милиони гласачи ќе избираат речиси 350 градоначалници и околу 2.500 членови на градските совети. Во целата земја ќе бидат отворени повеќе од 13.600 избирачки места.
Карактеристично е што овие избори се одржуваат во денот на од неодамна воспоставениот официјален празник – Денот на љубовта и верноста кон командантот Чавез.
Во трка се владејачката Обединета социјалистичка партија и демократската опозиција, а според аналитичарите, власта ќе се обиде да ја зајакне својата позиција во локалните власти каде што според резултатите од регионалните избори кои се одржаа во декември 2012 година актуелниот режим успеа да победи во 20 од 23 сојузни држави. Опозицијата, пак, ќе се обиде да ја поврати своја позиција на управување на локално ниво.
За безбедноста на изборите ангажирани се 120 илјади војници и уште 40 илјади припадници на боливарските милициски групи. Покрај забраната за продажба на алкохол на денот на одржувањето на изборите, исто така, забрането е и носење огнено оружје и покрај поседувањето оружје па дури и за лицата од составот на безбедносните сили, освен оние кои се ангажирани за одржување на редот на изборниот ден.
Венецуелскиот изборен законик забранува објавување на резултатите од излезните анкети, сѐ до моментот на објавувањето на првиот официјален извештај за резултатите од гласањето.