Американскиот претседател Доналд Трамп е закана за Европската Унија, смета преговарачот за Брегзит од Европскиот Парламент, Ги Верхофстад.
Верхофстад во говор од Лондон порача дека Унијата се соочува со напади од надвор.
Освен Трамп, тој смета дека радикалниот исламизам и Владимир Путин се закана за европскиот проект.
– Само што се вратив од САД и мислам дека имаме трет фронт кој ја потценува ЕУ, а тоа е Доналд Трамп, изјави Белгиецот.
Меѓу другото, екс-премиерот на Белгија, кој сега е пратеник во Европскиот Парламент порача дека национализмот не е начин според кој треба да се води Европа и тоа би било штетно.
– Дваесет милиони луѓе загинаа како последица од национализмот во Европа, вели Верхофстад.
– Нема едно семејство на континентот или во Британија, а во кое го дедото или бабата не бил жртва на овие глупости, овие злодела од крајот на 19 и целиот 20 век. Најглупо што може да направите е идната организација на Европа да ја базирате на националистичи идеи. Тоа е како да си играте со оган, имајќи го предвид минатото, порачува тој.
Ги Верхофстад е претставник на Европскиот Парламент во преговорите за Брегзит, а претставници има и од Европската Комисија и Европскиот Совет, како и главен преговарач на Европската Унија.
Тој во своите говори пред колегите парламентарци е секогаш отворен и важи за човек кој секогаш зборува отворено “без влакна на јазикот“.