Лицето кое по сообраќајката на заменик министерот за труд и социјална политика, Диме Спасов, дошло да каже дека наводно тој го возел џипот, никаде не се споменува во официјалната приказна на Спасов.

НОВА објави дека ова лице, кое во билтенот на полицијата беше објавено со иницијалиите М.Т. е вработено во Министерството за труд и социјална политика. Ова за НОВА го потврдија извори од министерството и според нив, се работи за возачот на Спасов.

Според билтенот на МВР, некаде два часа по полноќ, откако Спасов почнал да бега од полицајците кое веќе почнале да земаат и искази, се појавило лицето М.Т. за да сведочи дека наводно тој го возел џипот „Туарег“ во кој биле Спасов и уште едно женско лице.

Возачот, сепак, не знаел да каже каде се случила сообраќајката, ниту да ја опише рутата по којашто се движел. Претходно придружничката на Спасов веќе дала исказ во кој потврдила дека тие биле сами во автомобилот, а и во моментот кога полицијата ги фатила по бркотниците низ Тафталиџе, од автомобилот излегол Спасов и девојката.

Пет дена по инцидентот, Спасов во интервју за една провладина телевизија изјави дека додека самиот го возел автомобилот, бил нападнат од вооружени лица, кои од засега непознати причини го бркале низ неколку скопски населба. Според него, во моментот кога застанал тие и физички го нападнале при што му бил вперен и пиштол.

Според верзијата на Спасов, набргу пристигнала и полицијата но тие превзеле ништо за да го заштитат од напаѓачите. Избегал од местото, затоа што се чувствувал загрозен.

На провладините медиуми беше објавено и видео на кое според нив, автомобилот го вози токму Диме Спасов.

НОВА објави дека лицата на снимките на „Сител ТВ“ кои наводно го вадат Спасов со пиштол од автомобилот се припадници на „Алфите“, а не насилници од коишто тој бегал. Со снимките располагало единствено УБК, а тие одбиле да ги достават снимките од СВР -Скопје, дознава НОВАТВ од извори во скопската полиција.

На прес конференцијата во вторникот, министерката за труд и социјална политика, Фросина Ременски изјави дека возачот кој во полиција се пријавил дека го возел службеното возило во петокот кога се случија сообраќајните незгоди, од понеделникот заминал на боледување.