Министерката за труд и социјална политика, Фросина Ременски на денешната прес-конференција на која најави кривични пријави за дополнителниот заменик-министер Диме Спасов и директорот на Агенцијата за вработување Владо Поповски за злоупотреба на службена должност, му упати неколку прашања на Поповски во врска со работењето на Агенцијата за вработување.
Го повикувам директорот на Агенцијата за вработување на Република Македонија(АВРМ), наместо да бега од својата одговорност за негрижата за материјалните средства на АВРМ на јавноста да и даде одговор на неколку прашања“, рече Ременски.
1. Ако четирите возила кои му биле дадени на користење на дополнителниот заменик министер се во сопственост на Министерството за труд и социјална политика, зошто во април оваа година, регистрацијата и осигурувањето на возилата се на име на Агенцијата за вработување?
2. Дали е вистина дека постојат дупликат картички за гориво за овие возила. Едните на име на вработени во Агенцијата, со кои се полнело гориво на бензиските пумпи на „Пуцко Петрол“, а другите на име на лица од министерството со кои се полнело гориво на бензиските на „Макпетрол“? На пример, има осум фактури за гориво, од кои четири се потпишани од возачи од Агенцијата за вработување , а други четири од непознати лица.
3. Дали инцидентот на дополнителниот заменик-министер кој неовластено со ваша дозвола го користел возилото на Агенцијата, беше причина за викенд-работата на архивата и на други служби во Агенцијата за вработување, а веќе денес да продолжи со сериозни закани кои водат службени белешки за сето ова горе наведено?
НОВА го контактираше директорот на Агенцијата за одговор на овие прашања, но тој ни рече дека телефонски не дава изјави и сите прашања да му ги испратиме на мејл и во текот на утрешниот ден ќе ни биде одговорено.
Таа рече дека во време во кое судија праќа граѓанин во затвор за украдени осум тегли ајвар и дека законот мора да важи за сите исто.
„Денеска кога судија осуди лице на казна затвор за осум тегли ајвар, незамислива е леснотијата и силеџиството врз правото и законите што се обидувате да го направите за да ја избегнете одговорноста за вашето незаконско однесување. Законот мора еднакво да важи за сите граѓани“, рече Ременски.