Д. Т
Еминентната косовска тинк-тенк организација Балкан форум денеска објави нова епизода од подкастот „Балканот и пошироко“ во која гостува Џабир Дерала од ЦИВИЛ.
„Во оваа епизода ја имаме привилегијата да бидеме домаќини на Џабир Дерала, ценет истражувачки новинар од Северна Македонија и добитник на Наградата за солидарност за новинари од Југоисточна Европа за 2024 година и Орден за заслуги од претседателот Зеленски“, се вели во објавата на Балкан форум.
Во 43-минутното интервју, Дерала зборува за своите новинарски почетоци, основањето на ЦИВИЛ, како и за заканите со кои се соочува поради неговата работа како медиумски професионалец и лидер на граѓанска организација за човекови права.
„Како основач на ЦИВИЛ, Дерала е посветен на промоцијата на демократијата, човековите права, владеењето на правото и слободата на печатот. Во оваа епизода, тој го споделува своето извонредно патување, предизвиците со кои се соочува и неговата визија за иднината на новинарството и човековите права во регионот“, пишува авторката на подкастот, Гонџе Коњуфца од Балкан форум.
Во интервјуто стана збор и за политичките состојби и процеси во Северна Македонија и во регионот, како и за начинот на кој функционира руската пропаганда. На прашањата поврзани со актуелните состојби во регионот и во Северна Македонија, Дерала предупреди на растечкиот национализам и на опасноста, ако не продолжи евроинтеграцијата, Северна Македонија се соочува со дестабилизација, односно тензии и потенцијално насилство.
Извор: Цивил Медиа