Учесниците на протестот во Приштина, по говорот на тројцата лидери од опозицијата почнаа да ја гаѓаат зградата на Владата со камења, солзавец и молотови коктели.
Припадниците на специјалните сили на полицијата на Косово се повлекоа во дворот на Владата и до сега, како што јавува Танјуг, употребиле солзавец.
Дворот на Владата е во пламен, демонстрантите бегаат во околните улици, а сообраќајот е блокиран.
Засега нема информации за тоа дали има повредени.
Полицијата користејќи солзавец успеала да ги растера демонстрантите и да ги оддалечи од зградата на Владата во Приштина којашто ја гаѓаа на крајот од протестот со молотови коктели и со камења.
Ова е најголем протест на опозицијата според бројот на учесници, а според првите проценки се работи за најмалку 15.000 граѓани кои протестираат.
Приврзаници на косовската опозиција во Приштина денеска одржуваат нов протест на кој повторно бараат поништување на Бриселскиот договор што се однесува на формирањето на Заедницата на српски општини и договорот за демаркација на границата со Црна Гора.




