Премиерите на Македонија, Црна Гора и Албанија, и претседателот на Србија Александар Вучиќ се сретнаа на работна вечера во премиерската вила во Охрид. Средбата е во пресрет на утрешната состанок на Отворен Балкан чиј домаќин е Македонија.
Пред почетокот на работната вечера Ковачевски посака добредојде нагласувајќи дека со особена чест ги пречекува на Самитот, посветен на иднината на иницијативата „Отворен Балкан“.
„Ја нагласувам иднината, затоа што докажавме дека Отворен Балкан го става зад себе минатото. Наместо ѕидови како некогаш, Отворен Балкан гради мостови. Отвора нови перспективи за нашите држави, за нашите народи, за нашите економии и за нашите општества“, истакна Ковачевски во поздравниот говор пред почетокот на работната вечера со колегите од регионот.
Самитот на Отворен Балкан во Охрид, стартува на 8 јуни 2022 година (среда) со почеток во 10:00 часот, со официјални обраќања на премиерите на Северна Македонија, на Албанија, како и на претседателот на Србија.
Годинава на Самитот учествуваат и Црна Гора и Босна и Херцеговина. Во Охрид пристигнаа и црногорскиот премиер Дритан Абазовиќ, претседавачот со Советот на министри на БиХ, Зоран Тегелтија, како и еврокомесарот за проширување Оливер Вархеи, кои исто така ќе имаат официјални обраќања. Видео порака ќе има заменикот помошник на државниот секретар на САД Габриел Ескобар.