Денешната Шарена револуција се фокусираше на селективната правда во Македонија. Особено по денешната одлука на претседателот Ѓорге Иванов кој денес најави дека делумно ја повлекува аболицијата за 22 политички експонирани лица.
Учесниците на протестот денес, пред Инфо Центарот на Европската унија во Скопје, напишаа на англиски “Selective justice is not justice” (Селективната правда не е правда). Денес во просториите на ЕУ во Скопје беа претставници на Европската комисија кои побараа повлекување на аболицијата на Иванов за да може да се продолжи со преговорите за решавање на политичката криза.
Претседателот на 12 април донесе одлука за колективна аболиција на 56 лица. Од нив за 22 лица денес тој ја повлече одлуката и изјави дека “ниту еден политичар не е над законот, ниту еден политичар не е недопирлив, напротив, секој ќе одговара за своите постапки”.
Денес демонстрантите палеа слики на Иванов и Груевски. Пред Собранието имаше полициски кордон кој стоеше на половина на булеварот за да ги спречи демонстрантите да фрлаат боја врз зградата на Парламентот.
