Кинескиот патнички авион, кој на 21 март се сруши во планина, при што загинаа сите 132 патници во него, намерно бил урнат од пилотот или од натрапник кој му влегол во пилотската кабина, соопштија истражителите. Податоците за летот од црната кутија пронајдена од кинескиот Боинг 737-800 покажуваат дека човечки фактор го натерал авионот да падне во планинската област Гуангкси на 21 март.
Експертите веруваат дека само убиство или самоубиство може да објасни како авионот завршил во речиси вертикална траекторија уривајќи се кон земјата. „Авионот се урнал со команда од некого во пилотската кабина“, изјави извор од истрагата за Wall Street Journal.
Иако пилотот е главен осомничен, истражителите не ја исклучуваат можноста член на екипажот или патник да влегол во кабината и ја презел контролата над авионот. Кинеските власти не пронајдоа докази за техничка неисправност во авионот и затоа се истражува екипажот, изјави за Ројтерс западен претставник.
Боингот 737-800 се урна на пат од Кунминг до Гуангжу, при што загинаа 123 патници и девет членови на екипажот. Тоа беше најсмртоносната воздухопловна катастрофа во Кина во последните 28 години. Тоа, исто така, ја поттикна China Eastern да ги приземји сите свои авиони Боинг 737-800. Авиокомпанијата соопшти дека приземјувањето било мерка на претпазливост, а не знак за некаков проблем со авионите, кои се меѓу оние на кои најмногу се потпираат авиокомпаниите ширум светот.
Во моментот на падот, екипажот не пријавил проблеми пред да изгуби контакт со контролата на летање. Сликите покажуваат дека падот оставил кратер длабок 65 метри во планинска падина, го скршил авионот и предизвикал пожар во околната шума. Пронајдени се повеќе од 49.000 парчиња авионски остатоци. Беа потребни два дена за да се најде црната кутија од пилотската кабина и шест дена за рекордерот за податоци за летот, кој беше закопан 5 метри под земја.
Сличен случај со намерно уривање на патнички авион се случи и во Германија, поточно во француските алпи кога пилотот кој се лекувал од депресија намерно го урна авионот на Germanwings. Тој се заклучи во кабината, и не му отвори на капетанот копилот кој беше надвор од кабината и му тропаше откако виде дека авионот паѓа. Загинаа сите 150 патници. (Преземено од Дејли меил)