Со 12 противпожарни возила и 26 пожарникари, локализиран е пожарот кој утрово беснееше на објектот на Градежниот факултет и Архитектонскиот факултет.
Причините за настанувањето на пожарот кој избувнал околу 9 часот утринава допрва ќе се утврдуваат, а на време биле евакуирани професорите и студентите и нема повредени.
Како што изјави командирот на Противпожарната бригада, Ѕвонко Томевски, тие повикот го добиле околу 9 часот и 10 минути и веднаш пристигнале на Градежниот факултет, каде по неколку минути обид за влез во дворот поради сообраќајниот метеж, влегле во дворот на објектот и интервенирале брзо за да спречат ширење на огнените јазици.
„Пожарот е пријавен меѓу 9 и 10 часот, се интервенираше со над 10 пожарни возила, бидејќи имаше опасност огнот да се прошири. Засега се утврдуваат причините, сите се евакуирани навремено. За среќа противпожарната единица не не наиде на никој во просториите каде што гореше“, изјави Томовски.
Зафатени биле три кабинети на Архитектура и два кабинети на Градежниот факултет, но поради интервенцијата најпрво на вработените а потоа и на пожарникарите, целосно се изгорени само два кабинети на Архитектонскиот факултет.
„Бев во мојата работна просторија и бев известен за пожарот од вработените во факултет. Приметив дека во еден од кабинетите дека излегува чад. Се јавив на секретарката и беше повикана противпожарна служба по што барав сите да бидат евакуирани. Дел од вработените се обидуваа да го изгаснат пожарот, но тој почна да зема размери со кои ние не можевме да се справиме. Материјалната штета ќе се надополни за среќа нема повредени“, изјави деканот на Градежен факултет, професорот Дарко Мословац.
Огнен Марина, деканот на Архитектонскиот факултет рече дека е задоволен за брзата реакција на вработените во Градежниот и Архитектонскиот факултет што довело до тоа да се евакуираат студентите кои биле во соседните простории.
„За жал се работи за стар објект, најстариот на Универзитетот „Свети Кирил и Методиј“. Ние пружиме максимални напори да го одржуваме објектот но одредени работи не можеме да го контролираме. Причините за пожарот допрва ќе се утврдуваат. Им благодарам на службите кои за жал имаа мал проблем набрзина да влезат во објектот, но со брза и кратка интервенција се обезбеди просторот“, рече Марина.
По денешниот пожар тој изрази надеж дека со градоначалникот на Скопје, Петре Шилегов, ректорот на УКИМ, Никола Јанкуловски и министерката за образование, Рената Дескоска, ќе најдат решение овие два факултета да бидат преместени во други, подобри простории.
Студентите пак, кои не сакаат да зборуваат пред камера, во разговор со новинарите рекоа дека настанала паника помеѓу нив кога виделе дека гори факултетот, но како што велат тие, за среќа никој не бил повреден по избувнувањето на пожарот.
„Влегов во дворот и имаше само чад, пламен никаде и отидов до сојуз да го оставам ранецот и истрчав да им кажам на колегите дека ни гори факултетот. Кога излегов надвор имаше веќе пламен кој многу брзо се ширеше. Пожарната не можеше на почетокот да влезе од коли на паркингот и мораа да ја кршат рампата и да викаат пајак да ги соберат останатите коли. Страшно беше, но за среќа нема повредени“, раскажува студентка на Градежниот факултет.
Пожарот утрово, за кој се уште се утврдуваат причините, избил на вториот кат на зградата, по што набргу го зафатил и покривот.