Американски новинар со 30 годишно искуство е уапсен откако се обиде да му постави прашање на министерот за здравство за контроверзните реформи во здравството.
Ден Хејман изјави дека е уапсен бидејќи „ја работел својата работа“, поставувајќи му прашање на министерто Том Прајс и на советничката на претседателот Трамп.
Хејман го следел Прајс додека влегувал во зградата на Капитол во Западна Вирџинија, и во раката држел мобилен за да го сними одговорот на прашањето дали здравственото осигурување ќе им биде укинато и на жртвите на семејно насилство.
Прајс не одговори, а неколку минути покасно, полицијата му стави лисици на Хејман и го изнесе од зградата.
„Тој не рече ништо, па јас бев упорен“, вели новинарот.
Хејман тврди дека не бил насилен, туку само си ја вршел својата работа.
Уапсениот и осомничен за „намерно прекинување на државните процеси“ е пуштен со кауција од 5.000 долари.
Вашингтон Пост јавува како во кривичната пријава се наведува дека Хејман „агресивно“ го прекршил просторот кој го штитат тајни агенти и предизвикал хаос извикувајќи прашања до министерот и советничката.
„Колку што ми е познато тоа е прв пат некој да биде уапсен за поставување на прашања“, вели Хејман.
Реформата на законот познат како Обамакеар подразбира укинување на здравственото осигурување на некои од луѓето со претходно воспоставени дијагнози. Американската унија за граѓански права во Западна Вирџинија соопшти дека апсењето на Хејман е знам на „опасни времиња“ за слободата на медиумите.