Македонска Академија на Науките и Уметностите и Општина Центар одбележаа 95 години од раѓањето и 15 години од смртта на еден од основоположниците на современата македонска литература Славко Јаневски. Со рецитал на делови од неговото творештво и обраќање на академиците Томе Серафимовски, Влада Урошевиќ и Катица Ќулавкова присутните имаа можност да слушнат нешто повеќе за огромниот опус на Јаневски.
Во име на МАНУ и во име на претседателот на МАНУ, Владо Камбовски на присутните им се обрати академик Влада Урошевиќ.
„Заборавот е страшна дупка. Делото на Славко Јаневски е неограничен мајдан и треба почесто да се навраќаме на нив“, порача академик Урошевиќ.
Тој потсети на расказот „Самураи“, кој е најдобар книжевен споменик на нашиот град и е врв на прозното мајсторство.
Планината и големината, како што е Славко Јаневски, ќе остане бидејќи, рече академик Катица Ќулавкова е посилна и од политичките инциденти.
-Славко Јаневски беше голем писател. Тој беше визионер и на некој начин го предвиде развојот на светот. Неговото дело е трезор на колективната историја на македонскиот народ, во неговото дело е сместено богатството на македонскиот јазик и е жива меморија. Во овие моменти мора да се обединиме и духовно и културно и низ граѓанскиот ангажман и институциите. Она што најмалку ни треба е нетрпеливост и омраза, рече Ќулавкова.
Академик Томе Серафимовски и подари на општината седум скулптури: Славко Јаневски-портрет во бронза, Ѓорѓија Пулевски-портрет во бронза, Кирил Пејчиновиќ-Тетоец – фигура во бронза, Наим Фрашери – портрет во бронза, автопортрет – бронза, Партенија Зографски – фигура во бронза и Рака со книга – бронза.
Со ова читалната ќе стане и галерија, а ќе бидат изложени и неколку слики од повеќето од 100 уметнички дела, кои Славко Јаневски ги остави зад себе.
Помеѓу присутните беа и членовите на потесното семејство на Јанески, амбасадорот на Република Хрватска, Златко Крамариќ, поранешниот градоначалник на Град Скопје Трифун Костовски како и десетици почитувачи на делото на Јаневски.
Славко Јаневски е основоположник на Македонската современа литература и автор на првиот роман објавен на Македонски јазик – „Село зад седумте јасени“ (1952). Во своето 60 годишно неуморно творештво, Јанески остави опус од 15 романи, 11 книги поезија, 6 книги раскази, 8 книги за деца и голем број непубликувани во посебни книги препеви, книжевни и политички есеи и полемики, односно повеќе од 40 книги оригинално книжевно творештво.