Семејството на сопружниците Нуриа и Милиа Мустафови утрово остана без покрив над главата откако нивната трособна куќа, која се наоѓа на патот кон Китка во Драчево, ја зафати пожар. Причините за пожарот полицијата ги истражува.
Трособната куќа семејството Мустафови, велат, самите ја изградиле и во неа живееле над 20 години, а како растеле нивните деца, семејството се проширувало, и сега 15 луѓе остануваат на улица.
Во пожарот кој им ја зафати куќата, изгорени се и малкуте пари што ги имаат зачувано, како и поднесениот документ за легализација на земјиштето.
– Сега немаме ништо. Ја молам оваа наша држава да ни помогне бидејќи нас никој овде не ни помага. Јорганите, облеката, душеците, се е изгорено а овде три семејства живеат, вели Мустафова, на која и изгореле и апчињата која ги конзумирала бидејќи живее со два стента.
Нејзиниот сопруг Милиа Мустафов апелира до општинските и градските служби да му помогнат.
Вели не му требаат пари, доволен му е материјал за самиот да изгради нови ѕидови за неговото семејство.
Неговиот син Шаит Мустафов, исто така потенцира дека не бараат пари, туку вели, доволен им е материјал за да ја подигнат куќата. Нему и на неговата сопруга засега најпотребни им се облека и млеко за малите деца.
Семејството Мустафови се приматели на социјална помош. Милиа Мустафов, раскажува дека за прехранување работат приватно а кога немаат бараат и во конејнерите бидејќи сумата за сметките кои ги плаќал била повисока од самите примања.
Од социјалните служби на општината денеска ги информираа дека имало место за седуммина да бидат привремено сместени во Чичино Село во Прифатниот центар за бездомни лица, а нивниот проблем ќе се решава по завршените проценки од пожарот.