Владата што треба да се оформи по изборите од 5 јуни на кои ќе учествува само една партија, ВМРО-ДПМНЕ, нема да биде кредибилен партнер на меѓународната заедница и земјата се повеќе се оддалечува од својата европска перспектива, изјави денес Европската комисија (ЕК) која смета дека во Македонија нема услови за кредибилни избори.
Портпаролката на комесарот Јоханес Хан и денес, по кој знае кој пат и денес повтори дека нема минимум услови за одржување на избори што би биле признати како кредибилни од меѓународната заедница.
„Ние и во минатото повторувавме дека треба да се прочисти Избирачкиот список, да се осигура баласирано известување на медиумите, да се истражат наводите, на пример, за заплашување на гласачите. Ова едноставно не е направено. Веруваме дека во вакви услови, каква било влада што ќе произлезе од вакви избори, во кои три од четирите големи партии не учествуваат, нема да биде кредибилен партнер на меѓународоната заедница“, рече Маја Коцијанчиќ.
Извор од ЕК за НОВА вели дека договорот од Пржино е тој што ќе одреди кога можат да се одржат фер избори. Неговата целосна примена треба да донесе услови за вакви избори преку чист Избирачки список околу кој ќе се согласат сите политички партии и преку реформа на медиумите околу кој ќе има согласност на сите.
Нашиот извор подвлекува дека ситуацијата во Македонија станува навистина сериозна. Тој додава дека Комисијата и повеќе земји членки прават голем притисок врз македонската власт во надеж дека изборите од 5 јуни ќе се откажат и дека претседателот ќе ја повлече аболицијата. Со тоа треба да се создадат услови за нови меѓупартиски преговори и исполнување на сите услови за да можат во наредните месеци да бидат закажани вистински избори.
„Договорот од Пржино предвидуваше одредени чекори што требаше да бидат преземени пред одржувањето на изборите. Ова не се случи и во моментот ситуацијата каква што е не гледаме услови за кредибилни избори“, рече Коцијанчиќ.
Таа во повеќе наврати денес инсистираше на почитување на договорот од Пржино. Овој текст и понатаму е валиден, тој треба да се примени и преку примената на овој документ може да се реши политичката криза:
“Ургираме до политичките лидиери да преземат одлучувачки чекори и да ја решат состојбата, со целосно почитување на договорот од Пржино. Јасно е дека нешто мора да се стори. Ние сме подготвени да помогнеме, но одговорноста пред се се наоѓа кај политичките лидери”.