Побрзајте! Времето ви истекува! Ова е пораката која редовно ни ја упатуваат европските гатачи. Пораката потсетува на зборовите на гатачката Питија чии пророштва биле вистински загатки. Мудрите луѓе во античка Грција со денови се мачеле да го откријат нивното значење. Ние во денешната античка Македонија сме на исти маки.
Јоханес Хајндл три пати дојде во Скопје. Сите македонски очи беа свртени кон него. Сите се надеваа дека тој ќе извади волшебно стапче од џебот и хоп – ќе ни ја реши нашата длабока, сериозна политичка криза на задоволство на сите.
Но, волшебно стапче немаше. Хајндл вели излезот од политичката криза е Договорот од Пржино. Но тој, е блокиран, кризата трае а времето истекува.
По Хајндл еве го со слична порака и неговиот австриски имењак Јоханес Хан.
Премногу време беше загубено во последната година, ни твитна европскиот гатач. Од одамна слични пораки од Европа во Македонија редовно стасуваат.
Времето за кое толку зборуваат можеби се однесува на нашата препорака која ветува дека еден ден навистина ќе станеме полноправна членка на Европската унија. Европа одамна се заканува дека ќе ни ја одземе препораката. Уште од времето на Чехот Штефан Филе. Но од закана, до реализација на заканата, има огромен јаз. Кој Европа засега не е подготвена да го пречекори. На Унијата никогаш не и се случило да одземе дадена препорака и не посакува ваква премиера. А тој документ и гарантира на Унијата влијание во Македонија.
Времето кое истекува можеби се однесува на рокот во кој Специјалното обвинителство може да покрене обвинение за прислушуваните разговори. Рок кој истекува на 15 март 2017 година. А без правда и пресуди за сите кои се огрешиле од законот кризата едноставно не може да заврши.
Сега во Македонија би бил добредојден антички мудрец. Да ги протолкува зборовите на европските гатачи. Да каже дека да потребно е да се побрза полека. Тој што оди полека брзо стасува до целта, вели народната мудрост. На нашите политичари им недостасува vakva мудрост. He можат да видат дека вака никаде не одиме. А времето кое истекува се однесува на иднината на Македонија.