На вчерашното свечено затварање на фестивалот „Браќа Манаки“, две лица кои учествуваа во перформансот за кој обвинија дека е забранет, се качија на сцената а една од нив ги соблече и ги фрли чевлите, јави телевизија Орбис.
По настанот, обезбедувањето се качи по неа и веднаш ја отстрани од сцената.
Протестниот гест следи откако вчера уметниците кои се дел од сценската изведба на перформансот „Циклусот на животот“ предвидена за затворањето на фестивалот „Браќа Манаки“ соопштија дека била забранета.
Тие со протестно писмо за осудија цензурата од страна на фестивалот, која според нив се случила под силен притисок од политички кругови и конзервативната јавност, по што самата организација на фестивалот „Браќа Манаки“ одлучила да се повлечат и да не настапат.
Од управата на филмскиот фестивал „Браќа Манаки“ пак се правдаа дека перформансот „Циклусот на животот“ бил откажан заради тоа што авторите планирале на сцената да остават отпад од неколку килограми праски, сливи и дињи, како и неколку килограми мед и половина кубен метар огревно дрво.
За да се расчистила сцената ќе било потребно време, со што би била пролонгирана церемонијата за доделување на наградите на добитниците на годинешното издание на фестивалот Браќа Манаки и затоа решиле да го откажат перформансот.
Екипата која работале на перформансот е составена од: Мартин Кочовски (режисер и автор), Филип Јовановски (сценограф и коавтор), Горјан Милошевски (коавтор), Томе Темелкоски (тон и светло мајстор), Фолтин – Славе Јовев, Пеце Трајковски, Маријан Станич, Петар Николовски, Бранислав Николов; Лука Тошев (гитарист, студент на ФМУ) како и актерите од „Прилепски театар“ – Андон Јованоски, Александар Тодески, Димитрина Мицкоска и од „Битолски театар“- Илина Чоревска, Александар Стефановски како и Анастазија Христовска, Здравко Стојмиров, Долорес Попович(конференсие и актерка), Милан Секулоски и младите гимназијалци – Арменд Исаи, Маја Корлевска, Јани Патче и Бојан Југовски.
Сценската изведба се вика „Циклусот на животот“ и зборува за раѓањето, светогледот, откривање на моториката, осознавање на сексуалноста, стареењето и смртта.