Од управата на филмскиот фестивал „Браќа Манаки“ соопштија дека перформансот „Циклусот на животот„ во траење од 5 минути во рамките на програмата за затворање на фестивалот, дека авторите планирале на сцената да остават отпад од неколку килограми праски, сливи и дињи, како и неколку килограми мед и половина кубен метар огревно дрво. За да се расчистила сцената ќе било потребно време, со што би била пролонгирана церемонијата за доделување на наградите на добитниците на годинешното издание на фестивалот Браќа Манаки.

„Со цел да го избегнеме одложувањето на церемонијата за минимум 20 минути кои се потребни за расчистување на сцената и поставување на системот за озвучување, бевме принудени да го откажеме перформансот. Ова на ниту еден начин не беше со цел да се ограничи слободата на креативниот израз на авторот и неговата екипа што може да се види и од изведбата на перформансот на церемонијата на отворањето на фестивалот, зад која застана целиот фестивалски тим.“, вели во соопштението директорот на „Браќа Манаки“ Благоја Куновски.

Уметниците кои се дел од забранетиот перформанс утрово упатија протестно писмо во кое велат дека тоа е цензурата од страна на фестивалот, која според нив се случила под силен притисок од политички кругови и конзервативната јавност, по што самата организација на фестивалот „Браќа Манаки“ одлучила да се повлечат и да не настапат.

Ова е политичка блокада на еден моќен, убав ангажман на група „луди“ театарџии кои со ретка страст сакаат да донесат свежина на сцената и да навестат време кое треба да дојде, не’ чека и секако доаѓа. Ова е удар на посветата да се покаже дека ни треба слобода за да се откриеме себе си. Само преку тоа откривање можеме да достигнеме зрелост во нашиот човечки вид, во нашето „Movie On!“, напред. Сакаме да кажаме „Movie On!” ама фашистичките мозоци не’ тегнат назад. Овде треба да направиме место за „Feel the Light!“ ама тоа не се случува како и нашата готова изведба „Будење на пролетта“, соопштија во писмото учесниците во перформансот „Циклусот на животот“.