Аријанит Џафери, син на поранешниот функционер на ДУИ, Муса Џафери, и сопственик на компанијата за снабдување со електрична енергија „У Пауер“, синоќа физички го нападнал претседателот на Регулаторната комисија за енергетика, Марко Бислимоски, јави Дојче Веле.
Очевидци на настанот велат дека Џафери седнал на масата на која се наоѓал Бислимоски во еден скопски ресторан и по неколкуминутен разговор, физички се пресметал со него. Аријанит Џафери најпрво барал објаснување од Бислимоски зошто Комисијата за енергетика започнала постапка за одземање на лиценцата на неговата фирма, а потоа и физички го нападнал. Откако неколку пати го удрил и го влечел Бислимоски, три лица од придружбата на Џафери успеале да го отргнат и сите заедно избегале во непознат правец.
„На 05.10.2021 во 23.54 часот во СВР Скопје М.Б.(45) од Скопје пријавил дека на тераса од угостителски објект на подрачјето на Центар бил физички нападнат од А.Џ.(28) од Скопје. По целосно документирање на случајот, ќе биде поднесен соодветен поднесок“, информираат од МВР.
Полицијата брзо пристигнала на местото на настанот, но не успеала да го пронајде напаѓачот.
Против Џафери ќе биде поднесена пријава за кривично дело насилство, а за случајот е известен и јавен обвинител.
Бислимоски, според неофицијални информации, бил удиран по глава и по телото, а по нападот, Џафери си заминал од местото. Претседателот на РКЕ останал, пријавил и чекал да дојде полиција.